Криштиану Роналду қийин кунларни бошдан кечирмоқда. «Манчестер Юнайтед»га қайтганидан кейин жамоа асосий таркибида кафолатланган ўринга эга эмас, ўйинлар финал ҳуштаги чалинмасдан стадионни тарк этади, бош мураббий билан жанжаллашиб, захирада ғамгин чеҳра билан ўтиради. Афтидан, шундай давом эта олмасди - ва португалиялик супер юлдуз британиялик журналист Пирс Морганга ўта шов-шувли интервью берди. Championat.com сайти эса бир ярим соатлик суҳбатдан илк парчаларни эълон қилди. Оммавий ахборот воситалари, раҳбарият, ҳамкасблар ва ҳатто собиқ ҳамкорлардан келган калака, ҳақорат ва босим... Энг муҳими, Роналду 32та соврин, жумладан 5та «Олтин тўп», шунча Чемпионлар Лигаси кубоги, тўрт хил лигада 7та чемпионлик ва Португалия билан Европа чемпиони бўлганидан кейин эришган ҳурматсизликдан тўйган.

«Ҳаётимдаги энг қийин давр»...

«Ўзимни «Манчестер Юнайтед» менга хиёнат қилгандек ҳис қиляпман. Ушбу интервьюни нима учун беряпман? Чунки одамлар ҳақиқатни билиши керак. Ҳа, ўзимни хиёнат қилингандек ҳис қилдим - ва нафақат бу йил, балки ўтмишда ҳам».

Криштиануни шунингдек, клубнинг барча муаммоларида айнан уни бош айбдор қилиб қўйгани безовта қилмоқда. Энди эса буни ўта фаол равишда сиқиб чиқаришмоқда.

Роналду бир йил ичида «Манчестер Юнайтед»да йўллари кесишган уч мураббий ҳақида нима деди? Қисқача:

• Оле-Гуннар Сульшер ҳақида «У менинг ўртоғим, уни ҳурмат қилишдан бошқа ҳеч нарса йўқ, бу ерда»;
• Ральф Рангник ҳақида «У 10 йилдан ортиқ вақт давомида мураббий бўлмаганми? Шундай экан, қандай қилиб «Манчестер Юнайтед»ни бошқармоқчи эди? У ҳақида ҳатто ҳеч қачон эшитмаганман»;
• Эрик тен Хаг ҳақида «Уни ҳурмат қилмайман, чунки у мени ҳурмат қилмайди. Менга ҳурмат кўрсатмаган инсонни ҳеч қачон ҳурмат қилмайман».

Роналду Уэйн Рунига қаттиқ зарба берди

«Нима учун мени қаттиқ танқид қилишини тушунмайман. Балки у футболчилик фаолиятини аллақачон якунлагани ва мен юқори савияда ўйнашда давом этаётганим учундир. Рунидан яхшироқ кўринаман демайман. Лекин бу ҳақиқат».

Фарзандини йўқотган оғир дамда жамоатчилик томонидан қўллаб-қувватлангани ҳақида

«Бундай бўлиши мумкинлигини ҳатто тасаввур ҳам қилолмасдим», - деди Криштиану «Ливерпуль» мухлисларининг «Манчестер Юнайтед» билан ўйиннинг 7-дақиқасида (Роналдунинг рақами шарафига) трибуналарда «You~ll Never Walk Alone» қўшиғини куйлашганида.

Португалиялик юлдуз ўзининг клуби - «МЮ» уни бош­қаларга қараганда камроқ қўллаб-қувватлаганини таъкидлади. Июль ойида унинг янги туғилган ўғли реанимацияда эди ва Криштиану ўзини ёмон ҳис қилгани учун маш­ғулотларга боролмади. Роналдунинг сўзларига кўра, раҳбарлар унинг ҳалоллигига шубҳа қилишган.

«Мен учун оилам ҳамма нарсадир. Айниқса, бу йил бошимиздан кечирганларимиздан кейин», - дея қисқача хулоса қилди футболчи.

«МЮ»га қайтиши

ҳақида

«Мен юрагимга қулоқ тутдим. Сэр Алекс Фергюсон менга «Сен «Манчестер Сити»га ўтолмайсан», деди ва мен «Хўп бўлади, босс» дедим».

Клубдан ҳафсаласи пир бўлган...

«Қайта тикланиш, жакузи ва бошқа муолажаларда янги технологиялар, замонавий тренажёрлар ва илғор овқатланиш тизимининг йўқлиги мени хафа қилди. Сэр Алекс кетганидан бери клубда ҳеч қандай эволюцияни кўрмадим. Тараққиёт нолга тенг. Афсуски, 20-23 ёшлигимда эслаганларимни кўрдим.

Ҳеч қачон мураббий бўлмаган Ральф Рангникни спорт бўлимига таклиф қилишди. Қандай қилиб бундай даражадаги клубда шундай бўлиши мумкин? Менимча, бу нафақат мен учун, балки бутун дунё учун кутилмаган ҳодиса.

Клуб ўзига муносиб йўлдан бормаётганини Фергюсон ҳаммадан яхши билади. У билади, ҳамма билади. Буни кўролмаётганлар эса... улар шунчаки кўришни хоҳламайдилар. Улар кўр».

Роналду салбий нарсаларни бошқа томондан ҳам сезди: клуб олдинга силжимади - уни аввалгидан пастроқ малакали менежерлар бошқаради ва ёш футболчиларнинг Криштианунинг улкан тажрибасидан ўрганиш имкониятига бепарво муносабати афсонани жуда хавотирга солди.

Криштиану мухлисларга муҳаббатини тан олди

«Футболда энг муҳими мухлислардир. Сиз улар учун ўйнаяпсиз. Улар доим мен томонда. Ҳар сафар майдонга чиққанимда ҳам, кўчада юрганимда ҳам буни яққол ҳис қиламан. Мухлислар олдимга келиб, футбол учун қилаётган ишларимга миннатдорчилик изҳор қилишади, буни қадрлашади. Мен учун мухлислар ҳамма нарса. Шунинг учун ҳам ушбу интервьюни беряпман. Ўйлайманки, гапириш учун ҳозир энг тўғри вақт. Менимча, мухлислар ҳақиқатни билишлари керак.

«Манчестер Юнайтед»га фақат яхшилик тилайман ва шунинг учун ҳам қайтиб келгандим. Аммо клуб ичида бугунги «Сити», «Ливерпуль» ва ҳаттоки «Арсенал» каби энг юқори даражага чиқишга ёрдам бермайдиган баъзи омиллар мавжуд. Менимча, «Манчестер Юнайтед»дек гигант клуб бу учликнинг энг юқори қисмида бўлиши керак. Аммо, афсуски, бундай эмас».

Клубдан кетишига шаъма қилди

«Пикассо айтганидек, бирор нарсани тиклаш учун аввал уни йўқ қилиш керак. Агар клуб буни мендан бошламоқчи бўлса, муаммо йўқ. Мен «МЮ»ни яхши кўраман, доим ёнимни оладиган мухлисларни яхши кўраман. Аммо улар бошқача бўлишини хоҳласалар, кўп нарсани ўзгартиришлари керак».

РОНАЛДУ КАТТА МИҚДОРДА ЖАРИМА ТЎЛАЙДИ

 Англиянинг «Манчестер Юнайтед» клуби португалиялик ҳужумчи Криштиану Роналдуни журналист Пирс Морганга берган интервьюси учун жазолайди. Metro нашрининг ёзишича, португалиялик футболчи 1 миллион фунт стерлинг миқдорида жаримага тортилади. Аввалроқ, Криштиану Роналду The Sun нашри мухбири Пирс Морган билан суҳбатлашиб, «МЮ» ўзига хиёнат қилганини, бош мураббий Эрик тен Хаг эса ўзига нисбатан ҳурматсизлик қилганини, клубни яхши кўрса-да, тарк этишга тайёрлигини айтган эди. «Пикассо айтганидек, бир нарсани яратиш учун, олдин бошқа нарсани йўқ қилиш керак. Агар улар ишни мендан бошламоқчи бўлсалар, бунда ҳеч қандай муаммо кўрмаяпман. «Манчестер Юнайтед»ни яхши кўраман, мухлисларни яхши кўраман, улар доим мен томонда. Агар улар вазиятни ўзгартиришни хоҳласалар... кўп нарсаларни, жуда кўп нарсаларни ўзгартириши керак», - деган эди Роналду. Шундан сўнг, «МЮ» ушбу интервюга муносабат билдириб, расмий баёнот берди: «Клуб барча фактларга аниқлик киритгач, жавоб чоралари ҳақида ўйлаб кўради. Ҳозир бор эътиборимиз мавсумнинг иккинчи қисмига тайёргарлик кўриш, футболчилар, бош мураббий, персонал ва мухлислар орасидаги якдиллик, ишонч ва ҳозирги импулсни сақлаб қолишга қаратилган». Роналду ўтган ойда, «Тоттенхэм»га қарши ўйиннинг сўнгги дақиқаларида захирадан майдонга тушишни хоҳламаган эди. Шундан сўнг, бош мураббий тен Хаг уни таркибдан четлатди. Клуб эса 2 ҳафталик маоши миқдорида, яъни 1 миллион фунтга жаримага тортди. Энди бу сафар ҳам футболчини шундай миқдордаги жарима кутмоқда.

МУҲАММАДХОН тайёрлади.