9 сентябрь куни ЎФА Тартиб-интизом қўмитасининг навбатдаги йиғилиши ўтказилди ва унда бир қатор интизомий ишлар кўриб чиқилди. Унда қайд этилган, бироқ Тартиб-интизом қўмитаси ваколатига кирмайдиган, «2022 йилги мавсум регламенти»нинг бузилиш ҳолатлари бўйича эса ПФЛ қарор чиқарди. «Ўзбекистон кубоги чорак финалидан ўрин олган «Навбаҳор» - «Пахтакор» учрашувида Регламентнинг 2та банди бузилган. Биринчи навбатда, «Пахтакор» клуби 15.8-банд бўйича қайдномага кириши лозим бўлган шахслар рўйхатини 90 дақиқа аввал эмас, балки 60 дақиқа аввал тақдим этган. Бу ҳолат учрашув комиссарига 15.4-банд орқали изоҳланган. Ваҳоланки, мазкур банд­нинг тўртинчи хатбошиси жамоа эмас, комиссар учун тегишли ҳисобланади. Мазкур ҳолат ОАВ ходимлари, жумладан, учрашувларни трансляция қилувчи «Спорт» телеканали, қолаверса, мезбон жамоа эътирозига сабаб бўлган. Боиси «Навбаҳор» клуби комиссарга қайднома бўйича шахслар рўйхатини 90 дақиқа аввал тақдим этган. Регламент бандининг тўғридан-тўғри бузилишидан келиб чиқиб, «Пахтакор» клубига нисбатан жарима чораси қўлланилди.

Мазкур ўйиннинг сўнгги 20 дақиқасида «Навбаҳор» клуби расмийлари томонидан Регламентнинг 16.11-бандидаги ҳолатга зид ҳаракатлар амалга оширилган. Талаб бўйича майдондагиси билан қўшиб ҳисоблаганда, 8та тўп ҳозирлаб қўйилиши лозим. Мезбон жамоа ҳисобда олдинда бораётган паллада «Навбаҳор» расмийлари тўп узатиб турувчи болалар қўлидаги тўпларни яширишга ҳаракат қилишган. Мазкур ҳолатга ПФЛ вакиллари аралашганидан кейин майдон атрофида 3та тўп қолдирилган. Қолган тўплар масаласи эса изоҳсиз қолган. Шундан келиб чиқиб, «Навбаҳор» клуби жаримага тортилди. Маълумот учун, Суперлига 4-туридан ўрин олган «Пахтакор» - «Навбаҳор» учрашувида ҳам мезбонлар томонидан шундай ҳаракатни амалга оширишга уриниш комиссар томонидан қайд этилган. Бироқ ПФЛ комиссарининг талабидан кейин майдондаги 8та тўп ўз жойида қолдирилган.  

Шунингдек, Суперлига 18-туридан ўрин олган «Пахтакор» - «Металлург» учрашуви якунида меҳмонлар матбуот хизмати томонидан учрашув расмийларига нисбатан айбловлар эълон қилинган материал чоп этилди ва клуб жаримага тортилди. Боиси «Металлург» клуби Регламентнинг 14-бобидан келиб чиқиб, қайдномага расмий эътироз киритмади. Шундан келиб чиқилса, бу ерда клуб позицияси бир хил эмаслигини кўриш мумкин. Ҳар бир клубда учрашув расмийларининг ҳаракат ёки ҳаракатсизлигига нисбатан, шунингдек, учрашувни ташкил этиш билан боғлиқ ҳолатларга эътироз билдириш ҳуқуқи мавжуд. Буни қандай амалга ошириш масалалари Регламентга кўрсатиб ўтилган», - дейилади ПФЛ хабарида. Эслатма, «Металлург» клуби «Пахтакор»га қарши ўйиндаги ҳакамлар ҳақида танқидий мақола эълон қилганди.

***
Суперлига 18-туридан ўрин олган «Сўғдиёна» - «Навбаҳор» ўйини якунида юзага келган кўнгилсиз воқеалар ортидан меҳмон жамоа бош мураббийи Самвел Бабаяннинг лицензияси вақтинча муддатга қайтариб олинди. ПФЛ расмий сайти хабарида келтирилишича, у матбуот анжуманига кириш чоғи мухлислардан бири билан тортишиб қолган. «Мазкур вазиятга Миллий гвардия ходимлари ҳам аралашган. Бабаяннинг баланд овозда хунук сўзлар билан бақираётганини эшитган айрим журналистлар матбуот анжумани хонасидан кўчага югуриб чиқишган. Бу вақтда мутахассис ОАВ ходимлари ҳолатни тасвирга тушираётганини ўйлаб, ўз шерикларидан championat.asia нашри вакили телефонини тортиб олиш ҳамда ундаги видеотасвирларни ўчириб ташлашни сўраган. Шундан кейин Бабаяннинг шериги ҳамда ПФЛдан шу йилнинг 26 февраль санаси ID 140-рақамли аккредитация олган Фарҳод Умаралиев журналистнинг қўлидан шахсий телефонини тортиб олиб, ўзбошимчалик билан ундаги материалларни ўчириб ташлаган. Бу ҳаракатларни вазиятга гувоҳ бўлган бошқа нашрлар ҳам тасдиқлади. ПФЛ Регламентларида жамоа расмийлари мусобақалар давомида ўзларини қандай тутишлари аниқ кўрсатиб ўтилган. Жамоа устозлари ҳар қандай ҳолатда ҳам ўзларини намуна сифатида кўрсатишлари шарт. Биз футбол ва ундаги ҳиссиётларни ҳурмат қилган ҳолда, мураббийларнинг ўйин вақтидаги эмоцияларини табиий қабул қиламиз ва фақатгина жуда ошириб юборилган вақтда ишни тегишли қўмитага оширамиз. Бироқ Самвел Бабаян учрашув давомида уни тинимсиз ҳақоратлаган мухлис билан расмий тадбиргача ҳисоб-китоб қилишга уриниши тўғри эмас. Қолаверса, ПФЛ мусобақаларини ёритиб борувчи журналистларнинг стадионлардаги фаолиятини «ПФЛ томонидан ўтказиладиган тадбирлар ва мусобақаларда ишловчи ОАВ вакиллари учун йўриқнома» орқали тартибга солади, уларга шу асосда аккредитация тақдим этилади. Шундан келиб чиқиб, ПФЛ ўз тадбирларида фаолият олиб бораётган ОАВ вакилларини ҳар қандай ҳолатда ҳам ҳимоя қилади. Бабаян ва унинг шериклари томонидан амалга оширилган иш шу томондан қаралганда, на этика меъёрлари, на Регламент ва на қонунчиликка тўғри келади.

Юқоридагилардан келиб чиқиб, ПФЛ Самвел Бабаяннинг мазкур ишини Тартиб-интизом қўмитасига оширади ва унга қадар мураббийнинг лицензиясини қайтариб олади. Шунингдек, қўмитада иш кўриб чиқилаётган вақт жазо енгилроқ бўлиши учун «Навбаҳор» клуби ва шахсан Самвел Бабаянни ОАВ вакилларидан узр сўрашга чақиради. Бунга қадар ҳам матбуот анжуманида кўнгилсиз воқеа келтириб чиқарган, бироқ кейинчалик ўз айбига иқрорлигидан келиб чиқиб, қайта аккредитация берилган Фарҳод Умаралиев ҳужжати эса бекор қилинади ва у ПФЛ мусобақалари учун рўйхатдан қайта ўтказилмайди. Мазкур шахс матбуот анжуманида иштирок этгани аниқланса, ҳар қандай мезбон клуб жаримага тортилади», - дейилади ПФЛ хабарида.