Қоронғи режим
Logo
Самвел Бабаян кучли мураббий эмас, аммо маҳоратли менежер...!!!

Самвел Бабаян кучли мураббий эмас, аммо маҳоратли менежер...!!!

Бабаянни кучли мураббий эмас, ўзбек футболини ипидан-игнасигача ўрганган маҳоратли менеджер сифатида ҳурмат қиламан. У футболимиздаги икир-чикирлардан хабардор, яхшигина “связь”ларга эга, уддабурон инсон сифатида ички биринчилигимизда исталган жамоани Суперлигада фаворитга айлантира олишига шубҳа йўқ. Шу сабабли ҳам ҳар бир футбол учрашувида унинг жамоаси қандай ўйин намойиш этиши эмас, Бабаяннинг қандай каромат кўрсатиши кун тартибидаги асосий масалага айланади. У томонидан амалга ошириладиган ҳар қандай ҳаракат кейинги ўйингача ОАВ ва ижтимоий тармоқларда “айланади”. Мана, охирги учрашувдан кейин унинг лицензияси олиб қўйилибди. Лекин ЎзПФЛ расмий сайтида ушбу дисквалификация бўйича берилган хабарда бир жиҳат эътиборимни тортди. Аслида ҳаммаси нимадан бошланди?..

“...меҳмонлар устози Самвел Бабаян матбуот анжуманига кириш чоғида футбол мухлисларидан бири билан тортишиб қолган...” дейилади ЎзПФЛ баёнотида. Қизиқ, стадионнинг матбуот анжумани ўтказиладиган ҳудудида мухлис нима қилиб юрибди? Бу борада Регламентда нима дейилган?

“16.4. Футбол клублари ўзларининг томошабинлари (жамоа мухлислари), шунингдек, клуб номидан бирор-бир учрашувда муайян вазифани бажараётган ҳар қандай шахс хулқи учун ҳам жавобгардир”.

“16.5. Клублар расмийлари ҳамда стадион расмийлари учрашув ўтказилиши билан боғлиқ зарур ташкилий масалаларни ҳал этиш учун масъулдир. Улар учрашув хавфсизлиги ҳамда тез тиббий ёрдам учун масъул органлар билан ҳамкорликда
учрашувдан олдин, учрашув давомида ва учрашувдан кейин стадионда, унга туташган ҳудудда интизом ҳамда жамоатчилик тартибини сақлаш учун барча зарур чораларни кўришлари шарт”.

Гарчи шундай экан, ўша можаро келиб чиққан ҳудудга мухлис киритилмаслигига масъул бўлган мезбон жамоага нисбатан нега чора кўрилмади? Ёки бу ерда Регламент талабларини четлаб ўтса бўлаверадими? Ахир, ҳаммаси мураббий ва мухлис ўртасидаги жанжалдан бошланмадими? Кўринишидан арзимасдек кўринган масала катта жанжални келтириб чиқарди ва бу айрим “журналистлар” учун айни муддао бўлди.

Ўтган мавсум чемпионат доирасидаги марказий учрашувлардан бири якунлангач, меҳмон жамоа расмийлари мухлислар ва рақиб жамоа расмийларини куракда турмайдиган сўзлар билан ҳақорат қилишган, якунда эса фақат мезбон жамоа тартиб-интизомни таъминлай олмаганликда айбдор деб топилиб, жазоланганига шахсан гувоҳ бўлганман...

Бу билан Бабаян ёки бошқа тартиббузарларнинг ёнини олмоқчи эмасман. Регламентга зид ҳар қандай ҳаракат жазоланиши мақсадга мувофиқ. Лекин можаронинг асл келиб чиқиш сабаблари ўрганилиб, унга алоқадор ҳар бир шахсга нисбатан жазо қўллаш керак. Акс ҳолда, Регламент рўкач қилинган пайт, бир томон жазолансаю, асл провокаторлар жазосиз қолса, бу адолат қарор топганини англатмайди...  

Уткир УМАРОВ, махсус мухбиримиз

Теглар

Изоҳ / Жавоб

Архив

Илтимос, санани танланг!

Алоқада бўлинг

Ахборот бюллетени

Янги янгиланишларни олиш учун бизнинг почта рўйхатимизга обуна бўлинг!