Қоронғи режим
Logo
Шимолий Корея Жанубий Корея билан урушни тўхтатиш шартини айтди

Шимолий Корея Жанубий Корея билан урушни тўхтатиш шартини айтди

Шимолий Корея раҳбари Ким Чен Иннинг синглиси Ким Ё Чжон Пхеньян Жанубий Корея билан урушни тўхтатишга тайёрлиги, аммо бунинг маълум шартлари борлигини маълум қилди.

Гап шундаки, Жанубий Корея президенти Мун Чже Ин жорий ҳафта икки корейс давлати ҳамда уларнинг иттифоқчиларини (АҚШ, Хитой) расман икки ўртадаги урушга барҳам бериш ҳамда яриморолда тинчлик ўрнатишга чорлаган эди.

Шимолий Кореяда тобора катта сиёсий нуфуз касб этиб бораётган Ким Ё Чжонга кўра, ўзаро алоқаларни яхшилаш борасида музокара бошлаш учун Жанубий Корея Пхеньянга нисбатан душманларча муносабатдан воз кечмоғи талаб этилади. Қайд этилишича, ярим асрдан буён давом этаётган урушни расман тугади деб эълон қилиш учун ҳозирча асос мавжуд эмас.

«Иккиёқлама муносабат, мантиқсиз талаблар, душманларча одатлар ва бизнинг ўз-ўзини мудофаа қилиш ҳуқуқимизга дахл қилувчи ғаним позициясидан воз кечмоқ лозим. Ана шу шартлар бажарилгандагина юзма-юз ўтириб, уруш тугаганини баралла эълон қилиш мумкин», – дейди Шимолий Корея раҳбарининг синглиси.

Жануб ҳамда Шимол ўртасидаги уруш 1953 йили сулҳ битими билан якунланган, аммо икки давлат ҳалигача уруш ҳолатида яшамоқда. Жанубий Корея президенти Мун Чже Ин бир неча йилдан буён 70 йиллик урушга буткул барҳам беришга уриниб келмоқда. Президент Мун Шимолий Корея раҳбари Ким Чен Ин билан Пэкту тоғида учрашди ҳам. Аммо шимоллик «доҳий» тинчлик музокараларига рўйхушлик бермаётир. Унинг буйруғи билан ҳатто икки томонлама музокаралар учун қурилган махсус бино портлатиб юборилди.

Сўнгги пайтларда эса гоҳ Шимол, гоҳ Жануб ўз мудофаа қудратини кўрсатиб, ҳарбий синовлар ўтказмоқда. Пхеньян Сеул ҳамда унинг иттифоқчиларидан иқтисодий санкцияларни бекор қилишни талаб этмоқда. Шимолий Корея раҳбариятига эса ядро қуролидан буткул воз кечиш талаби қўйилган. Аммо ҳар икки томон бир-бирининг шартларига кўнмаётир. Ким Чен Ин эса халқаро ҳамжамиятни хавотирга қўйиб, ядро қуролига эга бўлиш йўлидаги изланишларни қайта бошлаб юборган.

Шимолий Корея раҳбарининг синглиси Ким Ё Чжон берган сўнгги баёнот муносабатлар янада чигаллашаётганидан далолат бермоқда.

Эслатиб ўтамиз, 33 ёшли Ким Ё Чжон айни пайтда Шимолий Корея Меҳнат партияси марказий қўмитасининг тарғибот ва ташвиқот бўлими раҳбари ўринбосари лавозимида ишлаб келмоқда. У давлат раҳбарининг вориси экани ҳақида тахминлар мавжуд. Хусусан, ўтган йили Ким Чен Ин юрак жарроҳлиги операциясидан кейин ўлим тўшагида ётгани, унинг ўрнини синглиси эгаллаши ҳақида овоза тарқалган эди.

Шимолий Корея халқ демократик республикаси таъсис этилган 1948 йилдан буён ўлкани Кимлар сулоласи идора этиб келади. Жумладан, Ким Ир Сен 1948-1994, Ким Чен Ир 1994-2011 йилларда раҳбарлик қилган. Бобоси ва отасидан қолган «тахт»ни эса 2011 йилда Ким Чен Ин эгаллаган.

Манба: xabar.uz

Изоҳ / Жавоб

Архив

Илтимос, санани танланг!

Алоқада бўлинг

Ахборот бюллетени

Янги янгиланишларни олиш учун бизнинг почта рўйхатимизга обуна бўлинг!