No icon

Ўзбекистоннинг ижтимоий ҳимоя тизимини ривожлантириш учун БМТ томонидан 2 млн доллар ажратилди

Ўзбекистон Бош вазири ўринбосари Азиз Абдуҳакимов ҳамда Бирлашган Миллатлар Ташкилотининг мамлакатдаги доимий вакили Хелена Фрэйзер ижтимоий ҳимоя бўйича қўшма лойиҳани амалга ошириш тўғрисидаги шартномани имзолади.

Қайд этилишича, мазкур ҳужжат ҳеч кимни эътибордан четда қолдирмаслик мақсадида аҳолининг ижтимоий жиҳатдан энг заиф бўлган қатламларига ижтимоий ёрдам кўрсатиш борасидаги устувор йўналишларни белгилаб беради.

«Сўнгги йилларда Ўзбекистон йиллик ялпи ички маҳсулотининг 6—9 фоизини ижтимоий ҳимоя хизматларига йўналтириб келмоқда. Шунга қарамасдан тизимда унинг самарадорлигига салбий таъсир кўрсатувчи тўсиқлар мавжуд. Масалан, ижтимоий ҳимоя вазифалари ҳозирги кунда бир нечта вазирликлар ва идоралар зиммасида бўлиб, тарқоқ ҳолдадир. Бу эса, ҳимояга муҳтож инсонлар ва оилаларни танг вазиятлардан чиқариш учун зарур бўладиган умумий қарашлар ва комплекс ёндашувлар йўқлигига олиб келади.

Дунё тажрибаси шуни кўрсатадики, мамлакатда давом этаётган ижтимоий-иқтисодий ислоҳотлар баъзи ижтимоий жиҳатдан заиф аҳоли қатламлари учун қисқа муддатли кучли таъсирни юзага келтириши мумкин. Шу боис бундай инсонларга кучли ижтимоий ҳимоя тизими орқали ёрдам кўрсатиш зарур», — дейилади хабарда.

Бу борада, БМТ ҳамда Ўзбекистон ҳукумати мамлакатнинг ижтимоий ҳимоя тизимини ислоҳ қилиш дастурини биргаликда амалга оширишга келишди. Дастурнинг мақсади юқори сифатли ижтимоий ҳимоя хизматлари барча инсонлар учун бутун умрлари давомида кўрсатилишини таъминлашдан иборат. Дастур асосий эътиборни қуйидаги учта устувор йўналишларга қаратади:

  • ижтимоий ҳимоя бўйича ягона давлат органини ташкил этиш орқали ижтимоий ҳимоя вазифалари турли вазирликлар ва идоралар ўртасида тарқоқ ҳолда эканлиги муаммосини ҳал қилиш;
  • халқаро стандартларга мос равишда кенг қамровли миллий ижтимоий ҳимоя стратегиясини ишлаб чиқиш. Мазкур жараён ижтимоий ҳимоя тушунчасини хайрияга асосланган ёндашувдан инсон ҳуқуқларига асосланган ёндашув сифатида англашга ўтказишга урғу бериши кўзда тутилган;
  • ногиронлиги бўлган инсонларга ижтимоий ҳимояни тақдим этишда «нафақалар+хизматлар» интеграллашган ёндашувини синов тариқасида амалга ошириш. Қўшма дастур Ногиронлиги бўлган инсонлар ҳуқуқлари тўғрисидаги конвенцияни ратификация қилиш ҳамда Фаолиятнинг халқаро классификациясини жорий этиш орқали ногиронлиги бўлган инсонларнинг ҳуқуқларини янада кенгроқ таъминлаш ва уларнинг ҳаётларини сезиларли даражада яхшилашга эътибор қаратади.

Умумий қиймати икки миллион АҚШ долларига тенг бўлган қўшма дастур БМТ томонидан молиялаштирилувчи 24 та муваффақиятли лойиҳалардан бири бўлиб, уларни танлаш жараёнида жами 114 та таклиф ўрганиб чиқилди. Қўшма дастур кейинги икки йил давомида амалга оширилади.

Қўшма дастур Вазирлар Маҳкамаси, Бош Прокуратура, турли вазирликлар ҳамда фуқаролик жамияти ташкилотлари билан биргаликда амалга оширилиши кўзда тутилган. БМТнинг учта агентлиги – Халқаро меҳнат ташкилоти (ХМТ), БМТ Тараққиёт дастури (БМТТД) ва БМТ Болалар жамғармаси (UNICEF) ўз тажрибалари ва салоҳиятлари доирасида ушбу лойиҳанинг амалга оширилишида кўмак беради.

Манба: daryo.uz

Фикрлар

Яндекс.Метрика