Қозоғистонда блогерлар солиқ тўлашга мажбур бўлади
Қозоғистонда ижтимоий тармоқларнинг машҳур фойдаланувчилари ўз ресурслари, блоглари ва рекламадан олган даромадлари учун солиқ тўлаши керак бўлади. Тегишли қонунни Қозоғистон президенти Қосим-Жўмарт Тўқаев имзолади.
Уларга бундай рекламаларни мос равишда маркалаш талаб қилинади. Инфлуенсерлар нашр этилган контент учун жавобгар бўлиши ва расмий ҳисобни юритиши талаб қилинади.
Ёлғон маълумотларни жойлаштирган онлайн платформа фойдаланувчилари 20 ойлик ҳисоб-китоб кўрсаткичи миқдорида маъмурий жавобгарликка тортилади.
Тадбиркорлик фаолияти билан шуғулланувчи блогерлар учун эса бу 40 ойлик ҳисоб-китоб кўрсаткичида бўлади. Қозоғистонда 2023 йил ойлик ҳисоб-китоб индекси 3450 тенгени (7,7 доллар) ташкил этади.
Бундан ташқари, онлайн платформалар эгалари қонунга киритилган ўзгартиришларга кўра, солиқ тўлашдан бўйин товлаш ва ёлғон маълумотларга қарши курашда давлат органлари билан ҳамкорлик қилиши керак бўлади.
