Дзюдочиларимиз Жаҳон чемпионатининг бронза медалига сазовор бўлишди!
Айни дақиқаларда мусобақанинг сўнгги кунидан ўрин олган жамоавий баҳслар ўтказилмоқда. Ҳозиргина Ўзбекистон терма жамоаси бронза медали учун кечган беллашувда тунислик дзюдочиларни 4-0 ҳисобида мағлубиятга учратди.
Дастлабки икки жуфтлик беллашувида тунислик дзюдочилар татамига чиқмагани боис, ғалаба автоматик тарзда терма жамоамизга тақдим этилди. Қолган икки учрашувда эса Элнур Холмўминов (+81 кг) Карим Гарбидан, Сардор Ҳимматов (-60 кг) Ҳилалидан устун келди.
Шу тариқа, Ўзбекистон терма жамоаси кадетлар ўртасидаги жаҳон чемпионатининг бронза медалини қўлга киритди. Бу умумий ҳисобда ушбу жаҳон чемпионатидаги тўққизинчи медалимиз бўлди.
Эслатиб ўтамиз, Ўзбекистон терма жамоаси жаҳон биринчилигининг яккалик беллашувларида 1 та олтин, 4 та кумуш, 3 та бронза медали билан умумжамоа ҳисобида дунёнинг 60 давлати орасида 4-ўринни эгаллаганди.
