Садио энди Салоҳ билан тенг
«Бавария»нинг янги ярим ҳимоячи|ҳужумчиси Садио Мане Африканинг 2022 йилдаги энг яхши футболчиси сифатида эътироф этилди. Сенегал миллий жамоаси етакчиси махсус совринни Марокашдаги тантанали маросимда қабул қилиб олди. У сўровда собиқ клубдоши Муҳаммад Салоҳ (Миср) ва термадоши Эдуар Менди («Челси»)ни ортда қолдирди. Айтиш керак, Мане январь ойида Сенегал миллий жамоасининг тарихда илк марта Африка чемпиони бўлишига катта ҳисса қўшди. У шунингдек, клуб футболида «Ливерпуль» билан Англия кубоги ва Лига кубогида ғалаба қозонди, ЧЛ финалида ўйнади ва АПЛ кумуш медалини қўлга киритди.
Айтганча, Сенегал миллий термаси чемпионликка яраша Африканинг энг яхши жамоаси бўлди.
*** 2019 йили ҳам айнан Садио Мане Африка футболининг бош лауреатига айланган эди. У шу тариқа «қора қитъа»да 2 марта эътироф этилган Муҳаммад Салоҳ билан тенглашди. Эътиборлиси, ҳар икки футболчи сўровда кетма-кет равишда ғалаба қозонган (2020-2021 йилларда коронавирус пандемияси туфайли Африканинг энг яхши футболчиси расман аниқланмаган).
*** Факт: Африкада охирги 4та сўровда фақат «Ливерпуль» вакиллари ғолиб чиқишди.
v Африкада қаторасига бош лауреат бўлиш рекорди Яя Турега тегишли. Кот-д~Ивуар миллий жамоасининг собиқ сардори «Манчестер Сити» аъзоси сифатида 2011-2014 йиллар оралиғида бош совринни ҳеч кимга берган эмас. Самуэль Это~О (Камерун) ҳам айнан 4 марта лауреат бўлган, фақат кетма-кет равишда эмас.
Африкада йил лауреати бўлиш бобида етакчи футболчилар
- Самуэль Это~О (Камерун) - 4 марта
Яя Туре (Кот-д~Ивуар) - 4 марта
- Жорж Веа (Либерия) - 3 марта
Абеди Пеле (Гана) - 3 марта
- ал Ҳожи Диуф (Сенегал) - 2 марта
Нванкво Кану (Нигерия) - 2 марта
Роже Милла (Камерун) - 2 марта
Дидье Дрогба (Кот-д~Ивуар) - 2 марта
Муҳаммад Салоҳ (Миср) - 2 марта
Садио Мане (Сенегал) - 2 марта
Сўз
- Баъзилар мен ва Салоҳ ўртасида рақобат борлигини айтишади. Очиғи, у билан рақобатлашишни тасаввур ҳам қилолмайман. Ўзаро муносабатларимиз ҳамон зўр. Медиа эса «интрига» йўлида рақобатимиз ҳақида кўп ёзади. Садио Мане (Африканинг 2022 йилги энг яхши футболчиси).
