Машҳур футбол агенти Мино Райола вафот этмаган экан...
Италиялик таниқли футбол агенти Мино Райоланинг вафоти ҳақидаги хабарлар тасдиқланмади. Италиялик таниқли инсайдер ва журналист Танкерди Пальмери 54 ёшли футбол агенти узоқ давом этган хасталикдан кейин вафот этгани ҳақида маълум қилганди.
Агентнинг ёрдамчиси Хосе Фортес Родригес эса хабарни кескин рад этиб, шифокорлар Райоланинг ҳаёти учун курашаётганини билдирган ва унинг аҳволи оғирлигини тан олган.
Райоланинг твиттердаги расмий саҳифаси ҳам Минонинг ўлими ҳақидаги хабарлар ёлғонлигини билдирган.
«Соғлиғим қандай эканига қизиқаётганларга: сўнгги 4 ойда иккинчи марта хабарлардан даҳшатга тушиб, асабийлашаётганим мени ўлдираяпти», - ёзилади постда.
Маълумот учун, Райола ҳозирга қадар Златан Ибраҳимович, Поль Погба, Эрлинг Ҳоланд сингари таниқли юлдузларнинг агенти саналади.
Эслатиб ўтамиз, январь ойида 54 ёшли футбол агенти шошилинч тарзда Миландаги шифохонага ётқизилгани ҳақида хабар берилган эди. Кўп ўтмай, Мино Райоланинг яқинлари бу шунчаки тиббий кўрик экани, футбол функционерининг соғлиғи яхшилиги ҳақида маълум қилишганди.
