ОФК Элдор Шомуродовни эътироф этди
ОФК расмий сайти Европанинг кучли клубларида ўйнаётган осиёлик бир қатор футболчиларни эътироф этди. Қувонарлиси, уларнинг орасида ҳамюртимиз Элдор Шомуродов ҳам бор.
«Элдор Шомуродов Европанинг энг кучли лигаларида ўзбекистонлик ва марказий осиёлик футболчилар нималарга қодир эканлигини исботлаб берди.
2020 йилда Шомуродов Илёс Зейтуллаевдан кейин A Серияда ўйнаган иккинчи ўзбекистонлик бўлиш учун «Женоа»га кўчиб ўтди. Унинг кўк-қизил либосдаги ўйини Жозе Моуриньо эътиборига тушди ва у Италия пойтахтига кўчиб ўтди.
27 ёшли футболчи «Рома» сафидаги дебютини «Фиорентина»га қарши ўйинда (3:1) голли узатма билан нишонлади ва мавсумни 39 ўйинда 5 гол ва 6 голли узатма билан якунлади. Май ойида Шомуродов УЕФA турнирида ғалаба қозонган биринчи ўзбекистонлик футболчи бўлди. Унинг финалдаги иштироки ва иккита голли узатмаси римликларга УЕФA Конференция Лигасининг биринчи чемпионлигини қўлга киритишига ёрдам берди», - дейилган ташкилотнинг расмий сайтида.
Қайд этиш жоиз, Шомуродовдан ташқари, Виталий Денисов ЦСКА сафида УЕФА кубоги ғолибига айланган бўлса, Улуғбек Бақоев «Тобол» билан Интертото кубоги соҳибига айланган.
***
Айтганча, Италиянинг «Рома» жамоаси бугундан машғулотларни бошлаган. «Тригория» базасига футболчилар бирма-бир кириб келишган. Чунончи, энг аввал ҳужумчи Заньоло келган бўлса, ундан кейин янги футболчи Неманя Матич ва Элдор Шомуродов машқ майдонига кирган.
Футболчилар дарвоза олдида тўпланган болаларга дастхат беришган, шу жумладан, Элдор Шомуродов ҳам либосга дастхат қўйиб берган.
«Рома» янги мавсумда Европа лигасида ўйнайди. Миллий чемпионат эса 14 августдан бошланади. 1-турда римликлар «Салернитана» меҳмони бўлишади.
Эслатиб ўтамиз, ўтган мавсумда Европа конференциялар лигасида энг тезкор футболчи деб Элдор Шомуродов топилган эди.
