Рейтинг: Қанча кўп бўлса, шунча яхши!

June 2, 2022

Молия соҳасида катта обрўга эга Forbes журнали сайёрамизнинг энг сердаромад спортчилари рейтингини эълон қилди. Эътиборли томони, унинг 1 ва 3-ўринлари футбол вакилларига тегишли. Йиллик даромади 130 млн. долларга баҳоланган «ПСЖ»нинг аргентиналик ҳужумчиси 1-ўринни банд этган бўлса, «МЮ» юлдузи Криштиану Роналду (115 млн. доллар) кучли учликдан жой олди. Икки футболчи орасида эса машҳур баскетболчи Леброн Жеймс бор - 121,2 млн. доллар.

Forbes журнали рейтингининг кучли 10талигида футболдан яна бир вакил бор - бразилиялик Неймар 95 млн. долларга тенг даромад билан 4-ўринни банд этди. Тўғри, Sportico маълумотларига қараганда, йилнинг энг сердаромад спортчилари рўйхатида Лионель Месси эмас, балки «Лос-Анжелес Лейкерс» баскетболчиси Леброн Жеймс етакчилик қилмоқда. Гап шундаки, Forbes журнали 2021 йил 1 май - 2022 йил 1 май оралиғидаги даромадни ҳисоблаган, Sportico бошқа муддатни. Хуллас, бу нашр баскетбол юлдузининг йиллик улушини 126,9 миллион долларга баҳолади - 90 «лимон» реклама шартномаларидан, 36,9 «лимон» маош ҳисобидан. Бунисида Лионель Месси ва Криштиану Роналду тегишлича 2-3-ўринларда. Яна бир маълумот: Sportico рейтингининг кучли 100талигида баскетболдан 36, Америкача футболдан 25 ва футболдан 13 нафар вакил бор.

Forbes талқинидаги йилнинг энг сердаромад футболчилари рўйхатига алоҳида эътибор қаратиш керак. Қаранг, кучли 4таликда «ПСЖ»нинг 3 нафар юлдузи бор. Жорий мавсум атиги жами 12та ўйинда қатнашган «Реал» вакиллари Гарет Бэйл ва Эден Азар ҳам юқори ўринларда боришаётганига нима дейсиз?

Дунёнинг энг сердаромад спортчилари (Forbes талқини)

№	Спортчи	Спорт	Клуби	Даромади	Маош+реклама
1	Лионель Месси	Футбол	«ПСЖ»	130 млн. доллар	75+55
2	Леброн Жеймс	Баскетбол	«Лейкерс»	121,2 млн. доллар	41,2+80
3	Криштиану Роналду	Футбол	«МЮ»	115 млн. доллар	60+55
4	Неймар	Футбол	«ПСЖ»	95 млн. доллар	70+25
5	Стефен Карри	Баскетбол	«Голден Стэйт»	92,8 млн. доллар	45,8+47
6	Кевин Дюрант	Баскетбол	«Бруклин»	92,1 млн. доллар	42,1+50
7	Рожер Федерер	Теннис	-	90,7 млн. доллар	0,7+90
8	Сауль Альварес	Бокс	-	90 млн. доллар	85+5
9	Том Брэди	Америкача футбол	«Тампа-Бэй»	83,9 млн. доллар	31,9+52
10	Яннис Адетокунбо	Баскетбол	«Милуоки»	80,9 млн. доллар	39,9+41

Дунёнинг энг сердаромад спортчилари (Sportico талқини)

№	Спортчи	Спорт	Клуби	Даромади	Маош+реклама
1	Леброн Жеймс	Баскетбол	«Лейкерс»	126,9 млн. доллар	36,9+90
2	Лионель Месси	Футбол	«ПСЖ»	122 млн. доллар	72+50
3	Криштиану Роналду	Футбол	«МЮ»	115 млн. доллар	60+55
4	Неймар	Футбол	«ПСЖ»	103 млн. доллар	65+38
5	Сауль Альварес	Бокс	-	89 млн. доллар	84+5
6	Стефен Карри	Баскетбол	«Голден Стэйт»	86,2 млн. доллар	41,2+45
7	Кевин Дюрант	Баскетбол	«Бруклин»	85,9 млн. доллар	37,9+48
8	Рожер Федерер	Теннис	-	85,7 млн. доллар	724 минг+85
9	Жеймс Харден	Баскетбол	«Филадельфия»	76 млн. доллар	40+36
10	Тайгер Вудс	Гольф	-	73,5 млн. доллар	8,5+65