Турли саналардаги қутловлар ортидан...
Ҳиндистонлик футболчининг кирдикорлари ғайриоддий ҳолатда ошкор бўлди. Шахсий ҳужжатларини сохталаштирган Притам Котал клублардан туғилган куни муносабати билан қутловлар қабул қилди ва... Гап шундаки, унга аталган қутловлар 4та турли санада тушди. Шу тариқа футболчининг ёшини сохталаштиргани ўз-ўзидан юзага қалқиб чиқди...
Эҳтимолки, Притам Коталнинг ўзи ҳам айнан қайси санада туғилганини адаштириб юборгандир. Ҳар ҳолда, ҳиндистонлик футболчини унинг собиқ клублари «Твиттер»даги саҳифаларида камида 4 хил вақтда қутлади. Жумладан, Притам 2015 йилнинг ўзида 2 марта (албатта, турли ойларда) табрик қабул қилган экан. Натижада тегишли органлар футболчининг фаолиятини алоҳида титкалаб чиқиб, унинг шахсий ҳужжатларини бир неча марта сохталаштирганини ошкор қилди.
Тушунарлики, Котал турли ёш тоифасидаги турнирларда иштирок этиш учун ҳужжатларини қайта-қайта қалбакилаштирган. Агар Википедия маълумотларига ишонсак, Притам 1993 йилнинг 8 сентябрь куни туғилган. Бироқ ушбу сана ҳақиқатга қанчалик мос? Айтиш қийин. Алоҳида таъкидлаш керак, Ҳиндистонда Притамга вақтида энг истиқболи футболчилардан бири сифатида қарашган, катта умид боғлашган. Тўғри, ҳозирда унинг фаолиятида сезиларли пасайиш кузатилмоқда. Ваҳоланки, 29 ёшда футболчи кўпинча ўзининг энг яхши ҳолатига чиқади одатда...
