Ўзбекистон аҳолисининг қачон тўла ичимлик суви билан таъминланади?
Ҳозирги вақтда Ўзбекистон аҳолисининг марказлашган ичимлик суви билан таъминланганлик даражаси 71,2 фоиз, 2026 йилда бу кўрсаткич 87 фоизга етказилади. АОКАда ўтказилган брифингда «Ўзсувтаъминот» АЖ ахборот хизмати раҳбари Акмал Муродов бу ҳақда маълум қилди.
Қайд этилишича, Муродов «Обод қишлоқ» ва «Обод маҳалла» давлат дастурлари доирасида ичимлик суви таъминоти ва оқова сув тизимларини ривожлантириш бўйича амалга оширилган ишлар юзасидан маълумот берган.
Унга кўра, 2022 йилда давлат дастурлари доирасида республика ҳудудларидаги 368 та объектда қурилиш-монтаж ишларини амалга ошириш учун 1 триллион сўм ажратиш кўзда тутилган бўлиб, ушбу маблағлар ҳисобидан 4057 километр ичимлик ва оқова сув тармоқларини ҳамда 403 та ичимлик ва оқова сув иншоотларида қурилиш ва реконструкция қилиш ишларини амалга ошириш режалаштирилган.
