Пенсия жамғармаси болалар нафақасининг ҳозирги миқдори ва уни тайинлаш тартиби ҳақида...

Пенсия жамғармаси болалар нафақасига доир фуқароларни қизиқтирган айрим саволларга жавоб қайтарди. Жамғарма ахборотига кўра, болалар нафақаси тайинлаш учун ариза ва унга илова қилинган ҳужжатлар билан биргаликда фуқаролар яшаш жойидаги фуқароларнинг ўзини ўзи бошқариш органига мурожаат қилиш лозим.

Болалар нафақаси ёки моддий ёрдам тайинлашда оиланинг ҳар бир меҳнатга лаёқатли ёшдаги аъзосини расмий даромад манбаларга эгалигини аниқлаштириш талаб қилинади. Белгиланган мезонлар асосида оилани кам таъминланган оила деб эътироф этиш ва унга болалар нафақаси ёки моддий ёрдамни тайинлаш ёхуд тайинлашни рад этиш “Ижтимоий ҳимоя ягона реестри” ахборот тизими орқали автоматлаштирилган тарзда амалга оширилади.

Ҳукуматнинг 2021 йил 21-октябрдаги қарори билан тасдиқланган низомда оилада расмий даромад манбаларига эга бўлмаган, охирги 6 ой мобайнида иш излаб меҳнат органларига мурожаат қилмаган, меҳнат органларида ҳисобда турмаган, ўзини ўзи банд қилган шахслар рўйхатига киритилмаган ёки ҳақ тўланадиган жамоат ишлари иштирокчиси ҳисобланмаган меҳнатга лаёқатли оила аъзоси мавжуд бўлган ҳолларда болалар нафақаси ёки моддий ёрдам тайинлаш рад қилинади. Низомнинг ушбу талаби бола 3 ёшга тўлгунича парвариш қилаётган оналарга (уларнинг ўрнини босувчи шахсларга), расмий даромад манбаларига эга бўлмаган ва охирги бир йил мобайнида “Темир дафтар” рўйхатида бўлган оилаларга нисбатан қўлланилмайди.

2021 йил 1 сентябрдан бошлаб болалар нафақаси тўловларининг ҳар ойлик миқдори қуйидагича белгиланган:

250 000 сўм — 3 ёшдан 18 ёшгача бўлган битта фарзанд учун;

325 000 сўм — ёши 3 ёшгача бўлган битта кичик фарзанд учун;

150 000 сўм — оиланинг иккинчи фарзанд учун қўшимча;

100 000 сўмдан — оиланинг учинчи ва ундан кейинги ҳар бир фарзанди учун.

“Болалар нафақаси оиладаги болалар сонидан келиб чиқиб тайинланади”, дейилади Пенсия жамғармаси ахборотида.