Самарқандда ЕЧЛ финалидан кейин «Реал» ғалабасини йўл қоидасини бузиб нишонлаган ҳайдовчиларга чора кўрилди
УЕФА Европа Чемпионлар лигаси финалидан кейин Мадриднинг «Реал» клуби ғалабасини Самарқанд шаҳри кўчаларида йўл қоидасини бузган ҳолда нишонлаган бир қатор ҳайдовчиларга нисбатан чора кўрилди.
Самарқанд вилоят ИИБ ахборот хизмати хабарига кўра, 28 майдан 29 майга ўтар кечаси Самарқанд шаҳрининг Рўдакий кўчасида гуруҳ-гуруҳ бўлиб ва йўналишни кескин ўзгартирган, қолаверса, автомашинани йўловчилар транспорт ойнасидан бел қисмигача чиқариб олган ҳолатда ҳаракатланиб, бошқа автомашиналар ҳаракатига халақит берган видеолавҳалар ижтимоий тармоқларда тарқалиб, турли муҳокамаларга сабаб бўлган.
«Шу муносабат билан Самарқанд вилоят Ички ишлар бошқармаси жамоат хавфсизлиги хизмати йўл ҳаракати хавфсизлиги бошқармаси ходимлари томонидан суриштирув ишлари олиб борилиб, мазкур ҳолатларни содир этган 6та транспорт воситалари ва уларнинг ҳайдовчилари аниқланди. Улар билан тушунтириш ишлари олиб борилди», - дейилади Самарқанд вилоят ИИБ берган хабарда.
Эслатиб ўтамиз, Парижда ўтган ЕЧЛ финалида «Реал» Винисиуснинг ягона голи эвазига «Ливерпуль»ни минимал ҳисобда мағлуб этиб, бош совринга эга чиқди.
