Грециядан хушхабар, яна бир спортчимиз олтин медални қўлга киритди
Грецияда ўтказилаётган оғир атлетика бўйича ёшлар ўртасидаги жаҳон чемпионатининг бугунги кун баҳслари терма жамоамиз учун аталди. Қизлар ўртасида -87 кг вазн тоифасида ўтказилган баҳсларда Турсуной Жабборова олтин медални қўлга киритди.
Даст кўтариш машқида 109 кг натижа билан энг яқин таъқибчисини 9 кгга ортда қолдирган Жабборова силтаб кўтариш машқида 129 кг тошни кўтаришга муваффақ бўлди. Шубҳасиз, икки курашдаги 238 кг натижага ҳамюртимизнинг ҳеч бир рақибаси яқин кела олмади ва Турсуной мутлақ чемпионликни расмийлаштирди.
1. Турсуной Жабборова (Ўзбекистон) – 238 (109+129) кг
2. Энтенза Реес (Куба) – 226 (99+127) кг
3. Элизабет Оуенс (АҚШ) – 222 (99+123) кг
***
Грециянинг Ираклион шаҳрида ўтказилаётган ёшлар ўртасидаги дунё биринчилигида йигитлар ўртасида -102 кг вазн тоифасидаги баҳслар ҳамюртимиз Шарофиддин Амриддиновнинг ғалабаси билан якунланди.
Полвонимиз даст кўтариш машқида 168 кг натижа билан кумуш медални қўлга киритди. Силтаб кўтариш машқида эса 204 кг билан олтин медални нақд қилди. Асосийси, ҳар икки машқ якунида 372 кг натижа қайд этган полвонимиз чемпионликни тантана қилди.
- Шарофиддин Амриддинов (Ўзбекистон) – 372 (168+204) кг
- Петрос Петросян (Арманистон) – 363 (161+202) кг
- Муҳаммад Ҳамада (Фаластин) – 361 (168+193) кг
Қайд этиш жоиз, ушбу вазн Олимпиада чемпионлари Руслан Нурудинов ва Акбар Жўраев иштирок этадиган тоифага жуда яқин. Ёш ўғлонимизнинг ушбу ғалабаси оғир вазн тоифасида яна бир ўзбек полвонининг катта саҳнага чиқаётгани, номдор ҳамюртларига муносиб ўриндош етишиб чиқаётганидан далолат беради.
