Яна тақирбош мураббий
«Аякс» клуби раҳбарияти бош мураббий лавозимига Альфред Шрёдер расман тасдиқланганини эълон қилди. Амстердам жамоаси расмий сайтида берилган хабарга кўра, нидерландиялик 49 ёшли мутахассиси билан 2 йиллик шартнома тузилди. Томонлар муддатни автоматик равишда яна бир мавсумга узайтиришлари мумкин.
Альфред Шрёдер «Аякс»дан «МЮ»га йўл оладиган Эрик тен Хаг ўрнини эгаллайди. У мавсум-2018/2019да айнан Амстердам клубида тен Хаг ассистенти ролини бажарганди. Шрёдер кейинчалик «Барселона»да Роналд Куманга ёрдам берди. 2022 йилнинг январь ойида эса Бельгия лигаси иштирокчиси - «Брюгге» бошқарувини қўлга олганди.
Факт. Қизиқарли маълумот: «Аякс» раҳбарияти охирги вақтларда фақат тақирбош мураббийларни танламоқда. Ҳар ҳолда, Амстердам жамоаси бошқарувида ишлаган (ишлайдиган) охирги 4 нафар мутахассиснинг ҳеч бирида сочи йўқ. Булар - Петер Бош, Марсел Кейзер, Эрик тен Хаг ва Альфред Шрёдер. Нима, Нидерландия грандининг муваффақияти сири шумикан...?
