Ўзбекистоннинг 10 та энг кўп дивиденд тўлаган давлат корхонаси маълум бўлди
Давлат активларини бошқариш агентлиги 2021 йилда давлат улуши бўйича энг кўп дивиденд тўлаган 10 та корхона рўйхатини шакллантирди.
Дивиденд — бу акциядор учун иқтисодий компенсация шаклидир. Акциядор — бу компаниянинг камида битта акциясига эга бўлган ҳар қандай шахс. Ва олинган фойдани тақсимлаш усулларидан бири бу дивидендлардир. Шу тарзда акциядор ҳар йили компания томонидан белгиланган йиллик суммани олади.
2021 йил якуни бўйича бу корхоналар жами 13,2 трлн сўм тўлаган.
- Биринчи ўринда «Навоий кон-металлургия комбинати» — 9,9 трлн сўм;
- Иккинчи ўринда «Олмалиқ кон-металлургия комбинати» — 2,4 трлн сўм;
- Учинчи ўринда «Ўзбекнефтгаз» — 240,5 млрд сўм дивиденд тўлаган.
Тўртинчи ўринда «Ўзбекистон металлургия комбинати» (131,3 млрд сўм), бешинчи ўринда эса «Фарғонаазот» (104 млрд сўм).
Кейинги бешликда «Фарғона нефтни қайта ишлаш заводи» (91 млрд сўм), «Ўзавтосаноат» (80,2 млрд сўм), «Пойтахт қурилиш ва хизмат» (45,2 млрд сўм), «Иссиқлик электр станциялари» (40,2 млрд сўм) ва «Автокластер» (38,6 млрд сўм) корхоналари.
